Քրոմատներ

Քրոմատներ, քրոմական թթվի՝ H₂CrO₄ (քրոմատներ (VI)) և քրոմային թթվի՝ НСrO₂ (քրոմատներ (III), անցյալում՝ քրոմիտներ), աղերը։ Բյուրեղական նյութեր են։ Առավել կարևոր են քրոմատները (VI), որոնք օքսիդիչներ են։ Ալկալիական մետաղների քրոմատները (VI) լուծելի են ջրում, ծանր մետաղներինը՝ անլուծելի։ MgCrO₄→BaCrO₄ շարքում լուծելիությունը նվազում է։ Թթվային միջավայրում քրոմատները (VI) փոխարկվում են երկքրոմատների՝ 2CrO₄^2-+2H⁺ $\rightleftarrows$ Cr₂O₇^2-+H₂O։ Քրոմատները (VI) ուժեղ օքսիդիչներ են, օգտագործվում են կտորեղենը ներկելու (որպես ժանտանյութեր), կաշին դաբաղելու, խեցեղենը գունավորելու և այլ նպատակներով։ Քրոմատները (VI) թունավոր են։