Նիտրիֆիկացում
Նիտրիֆիկացում, (< նիտր․․․․ և լատ․ facere–կատարել), նիտրացում, նիտրացնող բակտերիաներով հողում, ջրամբարների ջրում պարունակվող ամոնիումային աղերի վերածումը բույսերի կողմից յուրացվող նիտրատների։ Նիտրիֆիկացումով ավարտվում է ամոնիֆիկացումով սկսվող ազոտի օրգանական միացությունների հանքայնացումը։ Ընթանում է 2 փուլով, սկզբում նիտրիտային բակտերիաների (Nitrosomonas) միջոցով ամոնիում իոնն օքսիդանում է մինչև նիտրիտ իոնի, որը նիտրիտային բակտերիաներով (Nitrobacter) օքսիդացվում է նիտրատ իոնի։ Նիտրիֆիկացումը ընթանում է հողի պայմաններում։ Նիտրացնող բակտերիաները աերոբ օրգանիզմներ են, և հողում օդի անբավարար քանակությունն արգելակում է նիտրիֆիկացում։ Հողի լավ մշակումը բարելավում է աերացիան, նպաստում նիտրիֆիկացմանը։