Թիոլներ

Թիոլներ, (<թիո…), մերկապտաններ, օրգանական միացություններ, սպիրտների ծծմբային նմանակներն են՝ $RSH$ ընդհանուր բանաձևով ($R$-ը ռադիկալ է՝ $C{H}_3,C_2{H}_5$ և այլն)։

Թիոլները անդուր հոտով հեղուկներ են, եռում են ավելի ցածր ջերմաստիճանում, քան համապատասխան սպիրտները։ Վատ են լուծվում ջրում, լավ՝ սպիրտում և եթերում։ Ստացվում են մետաղների հիդրոսուլֆիդների վրա ալկիլհալոգենիդներ ազդելով։

Ունեն թույլ արտահայտված թթվային հատկություն։ Մետաղների հետ առաջացնում են աղանման միացություններ՝ մերկապտիդներ։ Օքսիդացնելիս թիոլները առաջացնում են սկզբում երկսուլֆիդներ, ապա սուլֆինաթթուներ և սուլֆաթթուներ։

Բնության մեջ գոյանում են սպիտակուցների նեխումից։ Կիրառվում են օրգանական սինթեզում և սինթետիկ կաուչուկի արտադրության մեջ։