Ներքին կոնվերսիա

Ներքին կոնվերսիա, գրգռված միջուկի՝ ավելի ցածր էներգիայով վիճակի անցման ժամանակ դիտվող երևույթ, երբ անջատվող էներգիան ոչ թե ճառագայթվում է $\gamma$-քվանտի ձևով, այլ անմիջականորեն փոխանցվում է նույն ատոմի էլեկտրոններից մեկին։ Ընդ որում $\gamma$- քվանտի փոխարեն առաքվում է կոնվերսիոն էլեկտրոն։ Էլեկտրոնները կարող են առաքվել ատոմի տարբեր թաղանթներից, ուստի համապատասխանաբար տարբերում են $K-,L-,M-$ և այլ էլեկտրոններ։ Էլեկտրոնի կինետիկ էներգիան փոքր է $\gamma$-անցման էներգիայից տվյալ թաղանթի կապի էներգիայի չափով։ Ներքին կոնվերսիան միշտ ուղեկցվում է բնութագրական ռենտգենյան ճառագայթումով։ Ներքին կոնվերսիայի հավանականությունը բնութագրվում է ներքին կոնվերսիայի գործակցով, որը հավասար է կոնվերսիոն էլեկտրոնների թվի հարաբերությանը նույն գրգռված մակարդակից միևնույն ժամանակահատվածում առաքված $\gamma$-ճառագայթների թվին․ $\alpha =\frac{N_e}{N_{\gamma }}$։ Եթե միջուկի գրգռման էներգիան մեծ է էլեկտրոնի և պոզիտրոնի հանգստի էներգիաների գումարից ($2m_e{c}^2$), ապա միջուկի անցումը գրգռված վիճակից ավելի փոքր էներգիա ունեցող վիճակի տեղի է ունենում էլեկտրոն–պոզիտրոն զույգի առաքմամբ։ Այս երևույթը՝ «զույգային» կոնվերսիան, 1934-ին առաջինը փորձով դիտել են Ա․ Ի․ Ալիխանովը, Ա․ Ի․ Ալիխանյանը և Մ․ Ս․ Կոզոդաևը։

Տես նաև

• Բետա-տրոհում
• Գամմա ճառագայթներ