Անցումային տարրեր

Անցումային տարրեր, տարրերի պարբերական համակարգում իրար հաջորդող քիմիական տարրերի խմբեր, որոնց ատոմներում լրացվում են ներքին էլեկտրոնային թաղանթները։

Տարբերում են $3d,4d,5d,6d,4f$ և $5f$ անցումային տարրեր։ Տարրերի պարբերական համակարգում 21–30 կարգահամար ունեցող տարրերի (սկանդիումից՝ ցինկ) ատոմներում լրացվում է $3d$ էլեկտրոնային մակարդակը։ Նրանց ատոմներում $4s$ մակարդակը զբաղեցված է։ 39—48 կարգահամար ունեցող տարրերի (իտրիումից՝ կադմիում) ատոմներում լրացվում է $4d$ էլեկտրոնային մակարդակը (5s լրացված է)։ 72—80 կարգահամար ունեցող տարրերի (հաֆնիումից՝ սնդիկ) ատոմներում լրացվում է $5d$ էլեկտրոնային մակարդակը ($6s$ լրացված է)։ Կուրչատովիումի ատոմում (կարգահամարը՝ 104) սկսվում է $6d$ էլեկտրոնային մակարդակի զբաղեցումը։ Անցումային տարրեր են նաև լանթանիդները և ակտինիդները, որոնց ատոմներում համապատասխանաբար լրացվում են 4f և $5f$ մակարդակները ($5s,5p,6s$ և, համապատասխանաբար, $6s,6p,7s$ մակարդակները լրացված են)։